सिन्धुली- सिन्धुलीमा बाक्लो हुस्सु लाग्न थालेपछि अत्याधिक चिसो बढेको छ । जाडोका कारण जनजीवन प्रभावित बनेको छ । चिसोको कारण वृद्धवृद्धा र केटाकेटी सबैभन्दा बढी प्रभावित भएका छन् । आइतबार जिल्लामा दिउँसो घाम समेत लागेको थिएन् ।
चिसो बढेपछि स्थानीय बासिन्दाले ठाउँ–ठाउँमा आगो ताप्ने गरेको देखिन्छ । केहि दिन अगाडि दिउँसो अलि–अलि घाम लागे पनि आइतबार बाक्लो हुस्सुको कारण अत्याधिक चिसो बढेको कमलामाई नगरपालिका ४ का स्थानिय सरोज लामाले बताउनुभयो ।
चिसो बढेसँगै जनजिवन नै प्रभावित भएको उहाँ बताउनुहुन्छ । “चिसोको कारण दैनिक काममा पनि समस्या परेको छ । बालबालिकालाई चिसो बाट जोगाउन मुस्कील छ । चिसोको कारण घरबाहिर निस्कन नसक्ने भएको छ ।” उहाँले भन्नुभयो । शीतलहरले आलु, गोलभेँडा र अन्य सागपातमा समेत असर पु¥याएको कमलामाई नगरपालिका ४ ज्यामिरेका किसान सरिता विक गुनासो गर्नुहुन्छ । “शितलहर पर्न थालेको छ । यो शितलहरले तरकारी खेतीमा असर गर्दछ । आइतबारबाट शितलहर पर्न सुरु गरेको छ ।” उहाँले भन्नुभयो ।
अत्याधिक चिसो बढेपछि बालबालिकामा निमोनिया र श्वासप्रश्वासको सङ्क्रमण बढेको छ । जाडो मौसममा ज्वरो, टन्सिल, दम, मुटुमा समस्या, जोर्नीको दुखाइ आदि रोग तथा समस्या हुने गरेको चिकित्सक बताउँछन् । खासगरी बालबालिका, वृद्धवृद्धा, गर्भवती, दीर्घरोगी तथा रोग प्रतिरोधात्मक क्षमता कम भएका व्यक्तिलाई चिसोले निकै सताउने गरेको उनीहरुको भनाइ छ । रुघाखोकी र ज्वरोको समस्या सिजन परिवर्तनको बेला प्रायःमा देखिन्छ । शरीरको प्रतिरोधक क्षमता कमजोर भएका व्यक्तिलाई मौसमी समस्याहरु देखिन्छन् ।
जाडोमा देखिने यस्ता विभिन्न समस्याबाट बच्नको लागि न्यानो रहनु नै उत्तम उपाय भएको चिकित्सकले बताएका छन् । साथै जाडोको समयमा वाफ लिने, नुन पानीले कुल्ला गर्ने, संक्रमण भएको अवस्थामा तातो झोलीय तरल पदार्थ बढी मात्रामा खानुपर्छ । एक्कासी गर्मीबाट चिसोमा र चिसोबाट गर्मीमा जानु हुँदैन । जाडोको समयमा बालबालिका तथा वृद्धवृद्धाहरुको स्वास्थ्यमा विषेश ध्यान दिन चिकित्सकले सुझाब दिएका छन् ।
