सिन्धुली – मरिण गाँउपालिकामा कृषकलाई बाख्राको खोर निमार्ण गर्न आर्थिक सहयोग गरिएको छ । मरिण गाउँपालिका र हेफर प्रोजेक्ट नेपालको आर्थिक तथा प्राविधिक सहयोगमा मानव तथा राष्ट्रिय विकास समाज (हेण्ड्स) नेपालको व्यवस्थापनमा सञ्चालित साझेदारीमा कृषि तथा पशु पालन उद्यमशिलता विकास परियोजना अन्तर्गत मरिणका २ सय ११ जना कृषकलाई व्यवस्थित रुपमा सुधारिको बाख्राको खोर निर्माण गर्न आर्थिक सहयोग गरिएको हो ।
खोर निर्माणका लागि कृषकलाई १० देखि २० हजार रुपैया आर्थिक सहयोग गरेको मरिण गाउँपालिकाले जनाएको छ । विद्यमान परम्परागत तथा निर्वाहमूखि कृषि तथा पशुपंक्षी पालन पद्दतिमा सुधार ल्याई आधुनिक तथा व्यवसायीकता तर्फ उन्मूख गराउने र व्यवस्थित रुपमा वाख्रा पालन तर्फ किसानहरुलाई उन्मुख गराउने उदेश्य अनुसार खोर निर्माणका लागि आर्थिक सहयोग गरेको आयोजकले जनाएको छ ।
खोर निमार्ण वापत उपहार कार्यक्रममा आयोजक संस्थाले उक्त रकम हस्तान्तरणका लागी खोर निमार्ण वापत रकम हस्तान्तरण कार्यविधि निमार्ण गरि कम्तिमा १० हजार र वढिमा २० हजार सम्म रकम हस्तान्रण गरिएको थियो । मरिण गाउपालिकाको अनुगमन समितिका संयोजक विमला माझिको नेतृत्वमा तथा सम्वन्धित वडा अध्यक्षहरु, पशु शाखा सहितको संयुक्त अनुगमनका आधारमा मापदण्ड अनुसार खोर निमार्णका आधारमा सो रकम निर्धारण गरिएको आयोजकले जनाएको छ ।
यस्तै, मरिण गाउपालिका वडा नं.४,५,६ र ७ मा २७ हजार थान किम्वुका विरुवाहरु पनि वितरण गरिएको छ ।मरिण गाँउपालिकाका अध्यक्ष विमर्श मुक्तान (प्रख्यात)को प्रमुख आथित्यतामा भएको कार्यक्रममा सम्वन्धित वडाका वडाअध्यक्ष, गाँउपालिकाको सामाजिक शाखा तथा परियोजना फोकल व्यक्ति, गाउपालिकाको इन्जिनिएर , पशु शाखाका कर्मचारी लगाएत आयोजक संस्थाको कर्मचारीहरुको उपस्थिति रहेको थियो ।
