सिन्धुली- सिन्धुलीमा २ सय ९३ जनामा डेङ्गी रोगको संक्रमण भएको छ । जिल्ला अस्पताल सिन्धुलीले दिएको तथ्याङक अनुसार साउन देखि हाल सम्म २ सय ९३ जनामा डेङ्गी रोगको संक्रमण भएको हो । जिल्लामा सबै भन्दा बढी डेङ्गी रोगको संक्रमण कमलामाई नगरपालिकामा देखिएको छ ।
डेङ्गी हुँदा एक्कासी चर्को ज्वरो आउने अस्पतालका एक चिकित्सकले बताए । ज्वरो भाइरसको कारण आउने छ । डेङ्गी भएमा जोर्नी र मांसपेशी दुख्ने, छालामा डाबर अथवा बिमिरा आउने, टाउको दुख्ने, वाकवाकी लाग्ने, बान्ता हुने एवम् आँखाको गेडी र हड्डी दुख्ने हुन्छ ।
कसैकसैलाई घाँटी दुख्ने, आँखा रातो हुने, खान मन नलाग्ने, वा पेट दुख्ने पनि हुन्छ । यसको जटिलता बढेसँगै नाक र गिजाबाट रगत समेत बग्ने हुन्छ । यो अरू ज्वरो जस्तै भएकाले छुट्टयाउन गाह्रो हुन्छ । त्यसैले चाँडै नजिकैको अस्पतालमा जचाउन जानुपर्छ । बिरामीको शरीरमा रक्तकोषिकाको कमीसँगै प्लेटलेट कमी भएपछि आन्तरिक र बाह्य रक्तश्राव हुन्छ ।
जटिलता बढेसँगै शरीरका विभिन्न भित्री अङ्गमा रगत कम हुन्छ र अङ्गहरूले राम्रो काम गर्न नसक्दा गम्भीर अवस्थामा पुगेर एक प्रतिशत बिरामीको ज्यान गरेको चिकित्सक बताउँछन् । सामान्य अवस्थाका बिरामीहरू अधिकांश बिस्तारै डेङ्गी ज्वरोबाट आफै निको पनि हुन सक्छ । डेङ्गी भाइरसका कारण ज्वरो आएमा प्रशस्त आराम गर्ने, झोलिलो तथा तागतिलो खानेकुरा खान चिकित्सकले आग्रह गरे ।
बढ्दो शहरीकरणसँगै प्लाष्टिकको अव्यवस्थित प्रयोग बढ्नुलाई डेङ्गी सङ्क्रमण बढ्नुको एक कारक मानिन्छ । प्रयोग गरेर फालिएका प्लाष्टिकका सामान, मोटर र साइकलका टायर, टिनका भाँडा र गमलाहरूमा जमेको पानीमा लामखुट्टेले अण्डा पार्छ । अण्डाबाट लार्भा, प्युपा हुदै वयस्क लामखुट्टेमा परिणत हुन्छ।
डेङ्गी सङ्क्रमित लामखुट्टेको जीवन चक्र चार साताको हुन्छ। यसले एक पटकमा १०० देखि ४०० वटासम्म अण्डा पार्छ। यो लामखुट्टेले जमेको पानीमा मात्र अण्डा पार्ने भएकाले घर वरिपरि कुनै पनि ठाँउमा पानी जम्न दिनु नहुने चिकित्सकको सुझाब छ । लामखुट्टेको स्वभाव घर वरिपरि र मान्छेको भिडभाडमा रहने खालको हुन्छ र पोथी लामखुट्टेबाट मात्र डेङ्गी रोग मानिसमा सर्न गर्दछ ।
