सिन्धुली – सिन्धुलीको गोलन्जोर गाउँपालिका ७ बाराका न्यून आए भएको परिवारका बालबालिका मौसम अनुसारका फलफूल तथा जगंली फल बेच्न व्यस्त छन् । विपन्न परिवारका बालबालिकाका लागि अहिले अमला आम्दानीको राम्रो स्रोत बनेको छ ।
गोलन्जोर गाउँपालिका ७ बाराकी सुस्मीता नेपाली नजिकको विपि राजमार्गमा सवारीसाधन आउने वित्तिकै दुवै हातमा प्लास्टिकमा पोको बनाएको अमला देखाउदै “अमला लिनुस अमला” भन्दै कराउनु हुन्छ । १२ वर्षिय सुस्मीता विहान जंगलमा अमला टिप्न जानुहुन्छ ।
जंगलबाट टिपेर ल्याएको अमला दिउँसो प्लास्टिकमा पोको बनाइ राजमार्ग छेउ बेच्न पुग्नु हुन्छ । “विहानै जंगलबाट टिपेर ल्याएको ।” प्लास्टिकमा पोको बनाएको अमला देखाउँदै उहाँ भन्नुहुन्छ , “यो एउटा प्लास्टिकको एक सय रुपैया हो ।” यस याममा अमला सुस्मीतालाई आम्दानीको राम्रो स्रोत बनेको छ । अमला दैनिक ५ सय देखि १ हजार सम्म बेच्ने गरेको उहाँ सुनाउनु हुन्छ । “आज १ हजार रुपैयाको अमला विक्रि भए छ ।” हातको पैसा गन्दै सुस्मीता भन्नुहुन्छ, “अब यो ४ वटा प्लास्टिकमा पोको बनाएको अमला बेच्नु छ ।” दिउँसो १ बजेबाट अमला बेच्न राजमार्ग र्झनु भएको सुस्मीताले साझँ ५ बजे सम्म १ हजारको अमला बेचि सक्नु भएको छ । विद्यालय बन्द भएको समयमा मौसम अनुसारको फलफूल तथा जंगली फल बेच्न विपि राजमार्ग आउने गरेको उहाँले सुनाउनुभयो ।
सोहि स्थानमा ६ वर्षिय बालक पनि दुवै हातमा प्लास्टिकमा पोको बनाएको अमला देखाउदै “अमला लिनुस् हजुर अमला लिनुस्” भन्दै ठुलो स्वरले कराउँदै छन् । गोलन्जोर गाउँपालिका ७ हायुडाँडाका ६ वर्षिय मनिश मंग्राती बिहान अंकलले टिपेको अमला बेच्न ल्याएको बताउँछन् । “म त रुख चड्न सक्दिन । यो सबै अमला अंकलले टिप्दिनु भएको हो ।” अमलाको पोको देखाउँदै उहाँले भन्नुभयो, “अमला बेचेको पैसा थोरै म राख्छु अनि अंकललाई दिन्छु ।” विद्यालय बन्द भएकाले अमला बेच्न आउँको उहाँले सुनाउनुभयो । सोहि स्थानमा ७ वर्षिय दिबिया मंग्राती पनि अमला बेच्दै हुनुहुन्छ । राजमार्गमा सवारी साधन आउने वित्तिकै दुवै हातमा प्लास्टिकमा पोको बनाएको अमला देखाउदै “एउटाको मात्र ५०, अमला लिनुस् हजुर” भन्दै कराउँने गर्नु हुन्छ । जंगलबाट बुवा ममि र अंकलले टिपेर ल्याएको अमला बेच्न ल्याएको उहाँ सुनाउनु हुन्छ । दिबिया दिनमा ५ सय देखि ८ सय सम्मको अमला बेच्नु हुन्छ । “अहिले पढाइ पनि छैन । त्यहि भएर अमला बेच्न आएको हो ।” उहाँले भन्नुभयो, “यहाँ अमला बेचेको पैसा सबै ममिलाई दिन्छु । ममिले यहि पैसाले घरमा तरकारी ल्याउनु हुन्छ अनि मलाइ पनि नयाँ लुगा किन्दिनु हुन्छ ।”
गोलन्जोर गाउँपालिका ७ बारा स्थित विपि राजमार्गमा अहिले अमला बेच्ने बालबालिकाको लर्को छ । उक्त क्षेत्रका बालबालिकाहरु अम्बा, काफल, फडिल, ज्यामुना, काँक्रा, जुनार, सुन्तला र नास्पाती लगाएतका मौसमी फलफुलहरु विक्रि गर्न राजमार्ग छेउँ पुग्छन् ।
