फिफा विश्वकप कतार २०२२ अन्तर्गत समूह सी को खेलमा पोल्यान्डले साउदी अरेबियालाई पराजित गरेको छ ।
एजुकेसन सिटी रंगशालामा शनिबार पोल्यान्डले दुवै हाफमा १-१ गोल गर्दै २-० को जित दर्ता गर्यो । पोल्यान्डको जितमा पिटर जिलेन्स्की र रोबर्ट लेवान्डोस्कीले १-१ गोल गरे । पहिलो हाफको इन्ज्युरी समयमा पेनाल्टी चुकाउनु साउदीका लागि महँगो सावित भयो । खेलमा तुलनात्मक रूपमा बढी आक्रमण गरेपनि अवसर सदुपयोग गर्न नसक्दा साउदी पराजित हुन पुग्यो ।
खेलको १३ अौं मिनेटमा साउदीको अग्रतासामु पोल्यान्डका गोलरक्षक वजसिएक सेचेज्नी बाधक बने । मोहमद कानोले पेनाल्टी क्षेत्र भित्रबाट पहिलो टचमै गरेको शक्तिशाली प्रहार सेचेज्नीले उत्कृष्ट बचाउ गरे ।
खेलको ४० अौं मिनेटमा पोल्यान्डले पिटर जिलेन्स्कीको गोलमा अग्रता लियो । रोबर्ट लेवान्डस्कीले पेनाल्टी क्षेत्र भित्रबाट दिएको पासलाई जिलेन्स्कीले गोल गरेका थिए । गोलरक्षक बाहिर निस्केको अवस्थामा उनलाई बिट गर्दै जिलेन्स्कीलाई पास दिएका थिए ।
