सिन्धुली– नेकपा एमालेका अध्यक्ष तथा पुर्व प्रधानमन्त्री केपि शर्मा ओलीले महिनावारी उमेरका सम्पूर्ण महिलालाई सेनेटरी प्याड किन्न वर्षमा १५ सय दिने ग्यारेन्टी गर्ने बताउनुभएको छ । सोमबार दुधौली नगरपालिकामा आयोजित चुनावी सभा कार्यक्रमलाई सम्बोधन गर्नुहुदै अध्यक्ष ओलीले यस्तो बताउनुभएको हो । “नेकपा एमालले महिनावारी उमेरका सम्पूर्ण महिलालाई सेनेटरी प्याड किन्नका लागि महिनामा १ सय २५ र वर्षमा १५ सय बैंक खाता खोलेर खातामा पठाइदिने व्यवस्था गर्नेछ । यो व्यवस्थालाई कसैले हटाउन सक्दैन । पहिले जेष्ठ नागरिकलाई भत्ता दिदा हामीलाई आलोचना गरेका थिए, आज तिनै आलोचना गर्ने मान्छे हामीसँग नकली प्रतिस्पर्धा गरिरहेका छन् ।”
अध्यक्ष ओलीले देश विकास गर्ने राष्ट्रिय शक्ति एमाले रहेको बताउनुभएको छ । उहाँले अहिले देशलाई विकासको अभियानमा हाक्न सक्ने राष्टिय शक्तिको आवश्यक परेको बताउनुभयो । “आज देशलाई विभिन्न स्वास्थ्य जोडिएका स्वार्थीहरुको समुहको गठबन्धन होइन एउटा राष्ट्रिय शक्तिको आवश्यक परेको छ । जस्ले देशको राष्ट्रियता, सार्वभौमसत्ता, स्वाधिनता, भौगोलिक अखण्डता आदिको रक्षा गर्न सक्छ । देशको राष्ट्रिय हितको रक्षा गर्न सक्छ र स्वाभिमानलाई माथि उठाउन सक्छ । महिला शक्तिकरण,बालबालिका, शिक्षा, स्वास्थ्य क्षेत्रमा हेर्न सक्ने बलियो स्थिर सरकारको आवश्यक छ ।” उहाँले भन्नुभयो ।
नेकपा एमालले सामाजिक, महिला, जेष्ठ नागरिक, युवा लगाएतको क्षेत्रमा काम गरेको उहाँले बताउनुभयो । एमालले छोटो समयमा ठुला योजनाको काम गर्न सफल भएको अध्यक्ष ओलीको भनाइ छ । “एमालले छोटो समयमा ठुला काम सम्पन्न गर्छ भन्ने उदारण मदनभण्डारी राजमार्ग हो । सिन्धुली, उदयपुर र मकानपुरको विकासका लागि मदनभण्डारी राजमार्गले खेलेको भूमिका तपाइ हामी सबैले बुझेका छौँ । राजमार्गले यी जिल्लालाई आधुनिकरण, औद्योगिकरण र व्यवसायीकरण गर्न सहयोग गरेको छ ।” उहाँले भन्नुभयो ।
अध्यक्ष ओलीले मंसिर चार गते हुन गइरहेको प्रतिनिधिसभा र प्रदेशसभाको निर्वाचनमा सुर्य चिन्हमा मतदान गरेर अत्याधिक बहुमतले जिताउन आग्रह गर्नुभयो । साथै उहाँले जनताको सरकार, विकास प्रेमी सरकार, बलियो सरकार गठन गर्ने काममा योग्दान गर्न सम्पूर्ण नागरिकलाई अनुरोध गर्नुभयो ।