अब कुन पालिकाको मतगणना हुदै छ ? अबको एक घण्टापछि माइकिङ गर्छन् । रातको १ बजे मतणना केन्द्रबाट बाहिर मत परिणाम कुर्दै गरेका झण्डै १ सय भन्दा बढी राजनितिक दलका समर्थकहरु देखिन्छ ।
मत गणनास्थलबाट बाहिर जो देखा पर्छ, ‘आयो.. आयो..’ भन्ने हर्सित आवाज ठूलै स्वरमा सुनिन्छ, दशौँ प्रश्नहरु तेर्सिन थाल्छन् । भित्र भइरहेको मतगणनाको परिणाम सुन्न आतुर दलका समर्थकलाई भोक र निन्द्राको भन्दा मत परिणामको चिन्ता छ । मतगणना केन्द्र बाहिर परिणाम कुरेर बस्नु भएको शिब कार्कि भन्नुहुन्छ–“भोट त हालियो, जित्ला कि नजित्ला सुन्न हतार छ । जित्छ कि भनेर कुरिरहेको छु ।”
मतगणनास्थल बाहिर करिब दुई सय जनाले घेरेर बसेका छन् । सुनकोशी, मरिण, हरिहरपुरगढी देखि परिणाम थाहा पाउन यहाँ आएका छन् । युवायुवती र वृद्धवृद्धा सबैको सहभागिता उत्साहजनक छ । सोमबार दिउँसो मतगणना सुरु भएदेखि नै कुरिरहनुभएको छ, कमलामाई नगरपालिका ५ का जितेन्द्र साहि पनि । अघिल्लो चुनावको मतगणनाभन्दा यसपटक उहाँलाई छुट्टै उत्सुकता छ । साहि भन्नुहुन्छ, “भित्र मतगणना भइरहेको छ, मत परिणाम सुन्न यही बसिरहेको छु ।” सबैको हारजित सुनेर मात्रै अरु काममा लाग्ने उहाँले सुनाउनुभयो ।
कमलामाई नगरपालिका ४ का सुर्य थापाले भोट खसाल्नुभएको यो पहिलो पटक हो । उहाँले विसं २०७४ मा भोट हाल्न पाउनुभएको थिएन । त्यत्ति चासो पनि उहाँलाई लागेन । अहिले चिनेकै मान्छे प्रतिनिधिसभाको उम्मेदवार भएकाले सोमबारदेखि गणनास्थल आसपासमै खाने बस्ने गर्दै परिणाम कुरिरहनुभएको छ । एक पटक मत परिणाम सुनेपछि अर्काेपटक सुन्न करिब २ घण्टा कुर्नुपर्छ । “तै पनि यो ठाउँ छोडेर अन्त जानै मन छैन”, उहाँले भन्नुभयोे ।
मतगणना भइरहेका स्थानमा स्पिकर छ । गणनास्थलका कर्मचारीले त्यसैबाट परिणाम सुनाउँछन् । परै बसेर पनि सजिलै सुन्ने व्यवस्था मिलाइएको छ । मरिण गाउँपालिकाका सुनिल चौलागाई भन्नुहुन्छ “मतगणना सुरु भयो, कसैले छोडेकै छैनन्,” उहाँले भन्नुभयो, “मतपेटिका आइपुगेदेखि भोकभोकै पनि नतिजा सुन्न बसेका छन् । हातहातमा मोबाइल भए पनि आफैँले सुनेको जस्तो विश्वास नभएकाले गणनास्थलमै कुरेर बसेका छौँ ।”
सदरमुकाम सिन्धुलीमाढी स्थित कन्दमुल तथा मुख्य निर्वाचन अधिकृतको कार्यालयमा मत गणना भइरहेको छ । मत गणनास्थलमा पनि परिणाम कुर्नेको उत्साह उस्तै छ । कमलामाई नगरपालिका ८ का विवेक गौतमलाई पनि पहिलेको चुनावको भन्दा अहिलेको चुनाव बेस्सरी लागेको छ । “मैले भोट दिएको मान्छेले पाएको मत परिणामको नजिता कस्तो आइरहेको छ भनेर सुन्न बसिरहेको छु ।” उहाँले भन्नुभयो ।
उनीहरु स्तै हरेक मत गणना भइरहेको स्थलमा एक सयदेखि तीन सय हुन्छन् । उनीहरु प्राय आफ्ना समर्थक र आफूले मतदान गरेको उम्मेदवारले पाएको मत सुन्न चासोका साथ गणनास्थलमा पुगेरै परिणाम सुन्न लालाहित भएका हुन् ।
