सिन्धुली – साउनको पहिलो सोमबार सिन्धुलीका शिवालयहरुमा पूजाआजा एवं दर्शन गर्ने भक्तजनको भीड लागेको छ । साउन महिना र सोमबार भगवान शिवको महिना एवं बार भएकाले आज स्नान गरी शिवालयमा पूजाआजा एवं दर्शन गरेमा मनोकांक्षा पूरा हुने, अटल सौभाग्य प्राप्त हुने धार्मिक विश्वास छ । जिल्लाको कमलामाई नगरपालिका ५ मधुटारको कालिमाइ मन्दिरमा बिहान देखि भक्तजनको भिड लागेको स्थनिय अभिषेक थापाले बताउनुभयो । मन्दिरमा जिल्ला भित्रका र छिमेकि जिल्लाका भक्तजन समेत आएको उहाँले बताउनुभयो । कालिमाइ मन्दिरमा बिहानको समयमा ५ सय भन्दा बढी भक्तजन दर्शन गर्ने आएको कालिमाइ मन्दिरका पुजारी कृष्ण प्रसाद पौडेलले जानकारी दिनुभयो ।
यस्तै दुधौली नगरपालिका २ लंगुरखोलाको मधुगंगा महादेव मन्दिरमा पनि पुजा गर्नेको भिड लागेको दुधौली नगरपालिका २ का वडा अध्यक्ष रितेस राउतले बताउनुभयो । उहाँका अनुसार उक्त मन्दिरमा तराइका जिल्ला लगाएत भारतबाट समेत हजारौँ भक्तजन पुजा तथा दर्शन गर्न आएका थिए । मन्दिरमा भक्तजनको घुइँचो बढे सँगै दुधौली नगरपालिकाले मन्दिर प्रवेशमा निषेध गर्ने निर्णय गरेको वडा अध्यक्ष राउतले बताउनुभयो । भारत र छिमेकि जिल्लाबाट आउने भक्तजनको अत्याधिक चापले कोरोना संक्रमण फैलिन सक्ने भन्दै मन्दिर प्रवेशमा निषेध गर्ने निर्णय गरिएको उहाँले बताउनुभयो । जिल्ला प्रशासन कार्यालय सिन्धुलीले मठ–मन्दिरहरुमा पुजारीले नित्य पुजा बाहेक अन्य सामूहिक पुजा तथा बलि दिने, कुनै मेला महोत्सव, हाटबजार, खेलकुद प्रतियोगिता, र भिडभाड हुने कुनै पनि क्रियाकलाप गर्न नपाउने निर्णय गरेको थियो । जिल्लामा भक्तजनको चाप बढेकाले सम्र्पूण शिवालय मन्दिर प्रवेशमा रोक लगाउने निर्णय गरिने प्रमुख जिल्ला अधिकारी सुरेश न्यौपानेले बताउनुभयो । जिल्ला प्रहरी कार्यालय सिन्धुलीलाई अनुगमन गर्न दिर्नेशन दिएको उहाँले बताउनुभयो । साउन महिनामा मन्दिरमा हुने भिडभाड कम गर्न निषेधाज्ञा कडाइ गरिने प्रजिअ न्यौपानेको भनाइ छ । साथै उहाँले निषेधाज्ञाको पालना गर्न जिल्लाबासीलाई आग्रह गर्नु भएको छ । महामारीको विषम परिस्थिति भएकाले यस्तो बेला घरमा नै पूजा पाठ गर्न प्रजिअ न्यौपानेले अनुरोध गर्नु भयो ।
सिन्धुलीका शिवालयहरुमा भक्तजनको भीड
