सिन्धुली – सिन्धुलीको मरिण गाउँपालिकाले स्वास्थ्य संस्थामा छोरी जन्माउने सुत्केरी आमाहरुलाई पोषण खर्च प्रदान गरेको छ ।
गाउँपालिकाको मातृशिशु सुरक्षा एवं संरक्षण कार्यविधि २०७९ अनुुसार लैङ्गिक समानता को लागि स्वास्थ्य संस्थामा छोरी जन्माउने सुत्केरी लाई शुक्रबार पोषण खर्च प्रदान गरेको हो ।
गाउँपालिकाका अध्यक्ष बिमर्श मोक्तानले वडा नम्बर २ की २१ बर्षीय मान कुमारी आलेलाई स्वास्थ्य केन्द्रमै पुगेर ५ हजार नगद प्रदान गरि कार्यक्रमको शुभारम्भ गर्नु भएको थियो ।
मातृशिशु सुरक्षा एवं संरक्षण कार्यविधि २०७९ अनुुसार नेपाल सरकारको आमा सुरक्षा कार्यक्रममा दिईने सुविधा वाहेक गाउँपालिकाको तर्फबाट प्रोटोकल अनुसार गर्भवती जाँच गर्ने २० बर्ष उमेर पुगेका महिलाहरुलाई ८ पटक जाँच गरेको दुई हजार, सुत्केरी हुन स्वास्थ्य केन्द्र आउनको लागि निशुल्क एम्बुलेन्स व्यवस्था गरिने र स्वास्थ्य संस्थामा छोरी जन्माउने सुत्केरीहरुलाई नगद ५ हजार दिईंने गाउँपालिकाले जनाएको छ ।
साथै,, गाउँपालिकाले आजैबाट प्राथमिक स्वास्थ्य केन्द्र कपिलाकोटमा रेबिज विरुद्धको भ्याक्सिन निशुल्क उपलब्ध गराउँने छ ।
कार्यक्रममा गाउँपालिकाकी उपाध्यक्ष बिमला माझी, प्रमुख प्रशासकीय अधिकृत ओम बहादुर दर्जी लगायतको उपस्थिति रहेको थियो ।
