हरिहरपुरगढी गाउँपालिकाको न्यायिक समितिले ३० वटा विवाद निरुपण गरेको छ । आर्थिक वर्ष २०७७÷७८ मा न्यायिक समितिमा जम्मा ३९ वटा विवाद परेकोमा ३० वटा विवादको समाधान भएको न्यायिक समितिका संयोजक अनिता कुमारी राईले बताउनुभयो । बाकी ९ वटा विवाद समाधानको प्रक्रियामा रहेको उहाँले बताउनुभयो ।
उहाँका अनुसार हरिहरपुरगढी गाउँपालिकाको न्यायिक समितिमा कुटपिट, जग्गाको खिचलो, लेनदेन सम्बन्धि विवाद आएको थियो ।
हरिहरपुरगढी गाउँपालिकाको ८ वटै वडामा मेलमिलाप केन्द्र रहेको छ । न्यायिक समितिमा दर्ता भएका विवादहरु न्यायिक समितिको छलफल पछि वडाको मेलमिलाप केन्द्रबाट नै धेरैजसो विवाद समाधान भएको संयोजक राईले बताउनुभयो ।
न्यायिक समितिमा समाधानको प्रक्रियामा रहेको ९ वटा विवादमा धेरैजसो लेनदेन र जग्गा खिचलो सम्बन्धि रहेको र समाधान गरिएको विवादहरुमा पनि लेनदेन र जग्गा खिचलो सम्बन्धि नै धेरै विवाद रहेको संयोजक अनिता कुमारी राईले जानकारी दिनुभयो ।
यस्तै, तीनपाटन गाउँपालिकाको न्यायिक समितिले पनि ३२ वटा विवाद समाधान गरेको तीनपाटन गाउँपालिकाका न्यायिक समितिका संयोजक पदम माया तामाङले जानकारी दिनुभयो । आर्थिक वर्ष २०७७÷०७८ मा न्यायिक समितिमा ४८ वटा विवाद दर्ता भएकोमा ३२ वटा विवाद समाधान भईसकेको र १६ वटा विवाद समाधानको प्रक्रियामा रहेको बताईएको छ ।
तीनपाटन गाउँपालिकामा पनि धेरैजस्तो जग्गा खिचलो र लेनदेन सम्बन्धिका विवाद आउने गरेको संयोजक तामाङले बताउनुभयो ।
